Էթիկայի հանձնաժողովի անդամ կարող է ընտրվել 35 տարին լրացած, բարձրագույն կրթություն և առնվազն 10 տարվա աշխատանքային ստաժ ունեցող ՀՀ քաղաքացին: Նույն անձը չի կարող երկու անգամից ավելի անընդմեջ ընտրվել հանձնաժողովի անդամ:
Էթիկայի հանձնաժողովն ունի 7 անդամ՝
1 բուժաշխատող,
1 հոգեբան
1 ներկայացուցիչ պացիենտների իրավունքների պաշտպանությամբ զբաղվող հասարակական կազմակերպություններից,
2 իրավաբան,
2 բժշկագիտության ոլորտում գործունեություն ծավալող գիտական աշխատող կամ գիտնական։
Դիմումը էթիկայի հանձնաժողովին էթիկայի հանձնաժողովի անդամների մրցութային ընտրության կարգը, էթիկայի հանձնաժողովի աշխատակարգը, գործերի քննության կարգը, շահերի բախման առկայության կամ բացակայության վերաբերյալ հայտարարագրի ձևը հաստատելու մասին ՀՀ առողջապահության նախարարի 08․11․2022 թվականի թիվ 75-Ն հրամանով սահմանված կարգին համապատասխան տրամադրվելու օրվանից, իսկ սեփական նախաձեռնությամբ գործի քննությունն սկսելու դեպքում, որոշումն ընդունելու օրվանից, էթիկայի կանոնի խախտման գործով քննության վարույթը համարվում է հարուցված։
Էթիկայի հանձնաժողովը էթիկայի կանոնի խախտման գործով քննության վարույթը հարուցվելուց հետո մեկ աշխատանքային օրվա ընթացքում՝ լիազոր մարմնի քարտուղարության միջոցով «Փոստային կապի մասին» օրենքով սահմանված կարգով, իսկ էլեկտրոնային փոստի առկայության դեպքում՝ նաև էլեկտրոնային փոստի միջոցով ծանուցում է՝
- այն բուժաշխատողին, ում դեմ ներկայացվել է դիմումը.
- այն անձին կամ մարմնին, որը ներկայացրել է դիմումը:
Էթիկայի հանձնաժողովում քննության են ենթակա բուժաշխատողի մասնագիտական էթիկայի կանոնների խախտումները, որոնք չեն նախատեսում քրեական կամ վարչական պատասխանատվություն։
Էթիկայի հանձնաժողովն անկախ մարմին է, վերջինիս անդամերն իրենց պարտականություններն իրականացնելիս անկախ են և առաջնորդվում են Սահմանադրությամբ և օրենսդրությամբ:
էթիկայի կանոնի խախտման գործով քննության վարույթն իրականացվում է և որոշումն ընդունվում է այն հարուցելու օրվանից առավելագույնը 20 աշխատանքային օրվա ընթացքում: էթիկայի կանոնի խախտման գործով քննության վարույթը կարող է երկարաձգվել մեկ անգամ 20 աշխատանքային օր ժամկետով, եթե՝
1) այլ մարմիններից կամ կազմակերպություններից կամ մասնագետից չեն ստացվել անհրաժեշտ փաստաթղթեր կամ եզրակացություններ, որոնք անհրաժեշտ են էթիկայի կանոնի խախտման գործի քննության արդյունքով եզրակացության ընդունման համար կամ
2) արձակուրդում կամ ժամանակավոր աշխատունակության մեջ կամ օտարերկրյա պետությունում գտնվելու հիմքով չի լսվել այն անձը, որի ներկայացրած պարզաբանումները նշանակություն ունեն էթիկայի հանձնաժողովի կողմից եզրակացություն ընդունելու համար կամ
3) էթիկայի կանոնի խախտման գործով քննության ենթակա հարցերը մեծածավալ են կամ բարդ և հնարավոր չէ դրանք ներառող հանգամանքների լրիվ, բազմակողմանի հետազոտումը սույն կարգով սահմանված ժամկետում։
էթիկայի կանոնի խախտման գործով քննության վարույթը իրականացվում է նիստերի միջոցով, որոնց ընթացքում էթիկայի հանձնաժողովը իր անդամների միջոցով ուսումնասիրում է գործի հանգամանքները, փաստաթղթերը և նյութերը՝ առկայության դեպքում, կազմակերպում լսումներ:
Դիմումի քննության արդյունքում, էթիկայի հանձնաժողովը ընդունում է հետևյալ որոշումներից մեկը՝
1) քրեական կամ վարչական պատասխանատվություն նախատեսող առերևույթ արարքներ հայտնաբերելու դեպքում կամ մասնագիտական էթիկայի կանոնների խախտման բացակայության հիմքով՝
ա. մերժել դիմումը կամ
բ. դադարեցնել գործի քննությունը սեփական նախաձեռնությամբ գործի քննությունն սկսելու դեպքերում,
2) օրենքով քրեական կամ վարչական պատասխանատվություն չնախատեսող մասնագիտական էթիկայի կանոնների խախտման հաստատման դեպքում՝
ա. լիազոր մարմին ներկայացնել առաջարկություն առաջին անգամ խախտում կատարած բուժաշխատողին նկատողություն տալու վերաբերյալ,
բ. մեկ տարվա ընթացքում կրկին բուժաշխատողի կողմից մասնագիտական էթիկայի կանոնի խախտում կատարվելու դեպքում լիազոր մարմին ներկայացնել առաջարկություն բուժաշխատողին խիստ նկատողություն տալու վերաբերյալ,
գ. մեկ տարվա ընթացքում երրորդ անգամ բուժաշխատողի կողմից մասնագիտական էթիկայի կանոնի խախտում կատարվելու դեպքում լիազոր մարմին ներկայացնել առաջարկություն՝ կասեցնել բժշկական օգնություն և սպասարկում իրականացնողի լիցենզիան միայն տվյալ բուժաշխատողի մասով՝ մեկ ամիս ժամկետով՝ հիմք ընդունելով «Լիցենզավորման մասին» օրենքի 36-րդ հոդվածի 1-ին մասի 12-րդ կետը:
էթիկայի հանձնաժողովի որոշումներն ընդունվելուց հետո մեկ աշխատանքային օրվա ընթացքում տրամադրվում են լիազոր մարմնին և առաքվում դիմում ներկայացրած անձին կամ մարմնին, ինչպես նաև այն բուժաշխատողին, ում դեմ ներկայացվել է դիմումը և բժշկական օգնություն և սպասարկում իրականացնող կազմակերպությանը, որտեղ աշխատում է բուժաշխատողը: Դիմում ներկայացրած անձին կամ մարմնին, ինչպես նաև բուժաշխատողին էթիկայի հանձնաժողովի որոշումների առաքումն իրականացնում է լիազոր մարմնի քարտուղարության միջոցով՝ «Փոստային կապի մասին» օրենքով սահմանված կարգով:
Այո, էթիկայի հանձնաժողովի որոշումները ստանալուց հետո 10 աշխատանքային օրվա ընթացքում դիմողի կամ բուժաշխատողի կողմից կարող են գրավոր բողոքարկվել էթիկայի հանձնաժողովին, որի ընթացքում որոշման կատարումը կասեցվում է: Բողոքը քննվում է այն ստանալուց հետո 5 աշխատանքային օրվա ընթացքում: Բողոքարկման արդյունքում հանձնաժողովը`
1) բավարարում է բողոքը` բեկանելով որոշումը և ընդունելով նոր որոշում, կամ
2) որոշումը թողնում է անփոփոխ:
Եթե չեք գտնում ձեզ հետաքրքրող հարցի պատասխանը, գրեք մեզ։
